Վստահորդը դիմել էր Ֆիդելիս իրավաբանական ընկերությանը՝ ջրամատակարար ընկերության կողմից իր նկատմամբ առաջադրված խոշոր ֆինանսական պահանջը վիճարկելու նպատակով։ Ընկերությունը պնդում էր, որ վստահորդը խախտել է ջրամատակարարման կանոնները և իրականացրել ապօրինի ջրամիացում, ինչի հիմքով հաշվարկել էր վճարման ենթակա զգալի գումար։
Վստահորդը չէր ընդունում իրեն վերագրվող խախտումը և գտնում էր, որ ընկերության կատարած հաշվարկը հիմնված չէ իրական փաստական տվյալների վրա։ Մասնավորապես, խախտման վերաբերյալ կազմված արձանագրությունում նշված տեխնիկական տվյալները, այդ թվում՝ խողովակի տրամագիծն ու ենթադրյալ ջրօգտագործման ծավալը, չէին համապատասխանում իրական վիճակին։ Սխալ ելակետային տվյալների կիրառման հետևանքով վստահորդի նկատմամբ հաշվարկվել էր անհամաչափ մեծ գումար, որը կարող էր առաջացնել լուրջ ֆինանսական հետևանքներ։
Գործը ստանձնելուց հետո մեր իրավաբանները մանրամասն ուսումնասիրեցին ընկերության կազմած արձանագրությունը, կատարված հաշվարկները, ջրամիացման տեխնիկական տվյալները, կողմերի միջև ձևավորված իրավահարաբերությունները և կիրառելի իրավական կարգավորումները։ Ուսումնասիրության նպատակն էր պարզել՝ արդյոք ընկերության արձանագրած խախտումը հիմնավորված է պատշաճ ապացույցներով, կիրառված հաշվարկային մեթոդաբանությունը համապատասխանում է սահմանված կանոններին, և վստահորդի նկատմամբ առաջադրված գումարը հաշվարկվել է հավաստի տվյալների հիման վրա։
Իրավական և փաստական վերլուծության արդյունքում բացահայտվեցին ընկերության արձանագրության և իրական տեխնիկական տվյալների միջև առկա էական հակասությունները։ Դրանք վերաբերում էին ինչպես ենթադրյալ խախտման հանգամանքներին, այնպես էլ հաշվարկի համար հիմք ընդունված ցուցանիշներին։ Այդ անհամապատասխանություններն ուղղակիորեն ազդել էին առաջադրված գումարի չափի և ամբողջ ֆինանսական պահանջի հիմնավորվածության վրա։
Մեր թիմը մշակեց վստահորդի գույքային շահերի պաշտպանությանն ուղղված դատավարական ռազմավարություն և դատարան ներկայացրեց պատշաճ հիմնավորված հայց՝ պահանջելով ոչ իրավաչափ ճանաչել ջրամատակարար ընկերության գործողությունը։ Հայցադիմումում մանրամասն ներկայացվեցին ընկերության արձանագրությունում ու հաշվարկներում առկա հակասությունները, ինչպես նաև դրանց իրավական հետևանքները։
Դատական քննության ընթացքում ընկերությունը ներկայացրեց հակընդդեմ հայց՝ պահանջելով վստահորդից բռնագանձել հաշվարկված գումարը։ Հակընդդեմ հայցի շրջանակում կիրառվեցին նաև հայցի ապահովման միջոցներ՝ վստահորդի գույքի նկատմամբ արգելանք դնելու ձևով։ Այս պայմաններում մեր իրավաբաններն ապահովեցին վստահորդի շահերի պաշտպանությունը ինչպես սկզբնական հայցով, այնպես էլ ընկերության ներկայացրած հակընդդեմ պահանջի և կիրառված սահմանափակումների առնչությամբ։
Դատարանում մեր կողմից ներկայացվեցին հիմնավոր փաստարկներ և ապացույցներ այն մասին, որ ընկերության կազմած արձանագրությունը և դրա հիման վրա կատարված հաշվարկը չեն արտացոլում իրական տեխնիկական վիճակը։ Ընդգծվեց, որ ֆինանսական պարտավորությունը չի կարող հիմնվել չստուգված կամ իրականությանը չհամապատասխանող ելակետային տվյալների վրա։ Միայն ընկերության միակողմանիորեն կազմած արձանագրության առկայությունը բավարար չէր վստահորդին վերագրվող խախտումը և հաշվարկված գումարի հիմնավորվածությունը հաստատելու համար։
Մեր իրավաբանները դատարանի ուշադրությունը հրավիրեցին նաև կիրառված հաշվարկային մեթոդաբանության վրա՝ ցույց տալով, որ սխալ տեխնիկական տվյալների օգտագործումը հանգեցրել է անհամաչափ և չհիմնավորված գումարի հաշվարկման։ Հետևաբար ընկերության գործողության իրավաչափությունը և գումարի բռնագանձման պահանջը չէին կարող հաստատված համարվել առանց հաշվարկի հիմքում դրված բոլոր հանգամանքների պատշաճ ապացուցման։
Դատարանը համակողմանիորեն ուսումնասիրեց գործի նյութերը, գնահատեց կողմերի ներկայացրած փաստարկներն ու ապացույցները և ընդունեց մեր կողմից ներկայացված իրավական դիրքորոշումը։ Արդյունքում ջրամատակարար ընկերության կողմից վստահորդի նկատմամբ կատարված հաշվարկը ճանաչվեց ոչ իրավաչափ, իսկ դրա հիման վրա առաջադրված խոշոր ֆինանսական պահանջը չբավարարվեց։
Այսպիսով, մեր թիմի իրականացրած մանրամասն իրավական և տեխնիկական վերլուծության, պատշաճ ձևավորված հայցապահանջների և դատարանում հետևողական ներկայացուցչության շնորհիվ հաջողվեց պաշտպանել վստահորդի գույքային շահերն ու կանխել անհիմն ֆինանսական պարտավորության կիրառումը։
Այս գործը ցույց է տալիս, որ կոմունալ ծառայություններից ծագող վեճերում ծառայություն մատուցող ընկերության կազմած արձանագրությունը և հաշվարկը ինքնին վերջնական ու անբողոքարկելի չեն։ Եթե դրանց հիմքում դրված փաստական կամ տեխնիկական տվյալները չեն համապատասխանում իրականությանը, դրանք կարող են վիճարկվել դատական կարգով։ Նման գործերում առանձնահատուկ նշանակություն ունեն տեխնիկական փաստաթղթերի մանրամասն ուսումնասիրությունը, հաշվարկային մեթոդաբանության ստուգումը և համապատասխան ապացույցների ժամանակին ներկայացումը։
Եթե կոմունալ ծառայություն մատուցող ընկերությունը ձեր նկատմամբ կատարել է անհիմն հաշվարկ կամ ներկայացրել է գումարի բռնագանձման պահանջ, մեր իրավաբանները պատրաստ են ուսումնասիրել գործի փաստական ու իրավական հիմքերը, գնահատել հաշվարկի հիմնավորվածությունը, մշակել պաշտպանության արդյունավետ ռազմավարություն և ներկայացնել ձեր շահերը դատարանում։